Recomendados

lunes, 8 de febrero de 2010

JOSÉ DOMINGO PORTILLO - YMAGUARÉGUI KO’ÁĜA IÑANBUE / Fuente: POESÍAS DEL PARAGUAY – ANTOLOGÍA DESDE SUS ORÍGENES. ARAMÍ GRUPO EMPRESARIAL.


Autor: JOSÉ DOMINGO
PORTILLO

(Enlace a datos biográficos y obras
En la GALERÍA DE LETRAS del
www.portalguarani.com )


YMAGUARÉGUI KO’ÁĜA IÑANBUE
Pejupaitéke peiméva cherehe pejapysaka.
Ndajapomo'ãi ha'éva, opa mba'e iñambuepa.
.
Pirapire ndaje opáta. Hi'upyrã avei
Ñaimo'ã tuja corbata jaiko javavarei.
.
Heta yvypóra ko'áĝa: tavyrón ha tarova.
He'iháicha hesavãva: peichaitéko che ahecha.
.
Ko arapy itujáma. Pychékeichama oguata.
Yrupẽicha ikuapáma. Ĝuaiĝui rumbýicha oku'epa
.
Yma ojoypypeguakuéra jopói omohembypa.
Ha oime ramo hasyetéva ojuehe oko'ipa.
.
Ko'áĝa lo mitãpe, hi'ã ojohesa'opa.
Térã katu kyse yvyrápe, ojoryguasu jepe ho'upa.
.
Ymaguare mitãnguéra isy ñe'ẽ ojapo.
Ahéinona ni ikéra imba'e'ỹre opoko.
.
Ko'aĝagua katu iraríre: yvytu ja'e hese.
Peteĩ tesa pirĩme isy ahy'ópe opo'ẽ.
.
Heta jevy sy voínte nombo'éiva mba'eve.
Memby oikopareínte. Ndoikuaái hapykuere.
.
Memby itavymírõ, ndaja'eséi pe isy.
Opukánte ipokovírõ ha oinupã hendape'ỹ.
.
Atyha rupi sororópe tenonde ojesururu.
Ñembo'erã tupãópe anínte reporandu.
.
Kachiãi, juru akuágui, avavépe ndabuguýi.
Kakuaa renonderãgui kachachã nomohembýi.
.
Mitãnguéra aĝaguáva omyendýta Añaretã.
Ndoikuaavéi Ñandejára. Ha aipo ikakuaaĝua.
.
Ymave karia'ykuéra itúape ombyao.
Ko'aĝagua ijukyvéma: itúape omoperõ.
.
Yma mitãrusukuéra viru'ỹ rehe ndoikói
Ko'aĝagua isogue. Ha ko'ýte nomba'apói;
.
Ymaguare kuñanguéra ijeheguínte iporã
Ko'áĝa petitera pe hova omboparapa.
.
Ymaguare oitypeírõ oity joa pe yty.
Ko'áĝa ikyre'ỹmírõ pare rehe ombyaty.
.
Ymaguare kuñanguéra yro'ysãnte hoy'u
Ko'áĝa katu cerveza kamby jyguéicha omboy'u.
.
Oime avei menakuéra: ka'u rapo ruvicha.
Tape ivaietevéva mitãme ohechauka.
.
Térã katu jeja'ópe hogaygua omoko'ẽ
Oinupã hembirekópe: karia'ýjeko ha'e.
.
Avei añatõimíta aĝagua tembireko.
Itahũre ajejapíta, oikóvamante toiko.
.
Tembireko aĝagua havõ ryjúi hekove.
Namichãi, kuãirũ overáva oipotapa katuete.
.
Oguyguy ápe ha pépe. Hógape ndopytavéi.
Hãimbiti umi ambuépe. Ha iménare oiko ojahéi.
.
Mitã, ĝuaiĝui ha itujáva: ohechávante oipota.
Omboykégui Ñandejára, toryjárõ oikopa.
.
Mamópa jahañaína, cheatõimíkena pya'e.
He'iháicha ña Celina: ¡Pytũguýpeko aime!
.
Peteĩ ky rupi'ápe he'i ahendu kokuehe:
Tuju, tavy ha tujágui, heta mba'e ñanohẽ.
.
Jaharõhína ko jaliabáicha, hi'aĝuietéma araha.
Javerapáma ju'i resáicha. Jagua ry'áire ñambojoja.
.
Ñamyangekóina pe Ñandejára. Ha'eñoitéko ñane pohã
Tomyatyrõ ko óga itujáva. Ĝuaiĝui rumbýicha oku'epa.
.
Japu mba'érõ ko ahendukáva pembohayvi ita cherehe.
Ha pejuhúrõ añeteguáva hatã porã pejepopete.
(De: Sol-La-Si. Revista folclórica especializada. N° 7. 1985. Edición especial: Homenaje a su fundador, Don José D. Portillo)
.
YMAGUARÉGUI KO’ÁĜA IÑANBUE. El poeta llama la atención sobre la vertiginosa transformación de las costumbres, donde el respeto a la palabra empeñada, a los adultos, a la práctica de la projimidad, son reemplazados por la mentira, el individualismo, la intriga y la delación.
.
Fuente: POESÍAS DEL PARAGUAY – ANTOLOGÍA DESDE SUS ORÍGENES. Realización y producción gráfica: ARAMÍ GRUPO EMPRESARIAL, Dirección de la obra: OSCAR DEL CARMEN QUEVEDO. Recopiladores y autores: RAÚL AMARAL, MARÍA BARRETO DE RAMÍREZ, AÍDA ORTÍZ DE CORONEL, ELA RAMONA SALAZAR S., RUDI TORGA / Tel. (595-21) 373.594 / arami@rieder.net.py – Asunción / Paraguay. 2005. 781 pp.).

No hay comentarios:

Publicar un comentario en la entrada