Recomendados

domingo, 10 de enero de 2010

CLEMENTINO OCAMPOS - CHE AKÃ KORAPY POTY / YVOTY ÁRA GUAHẼ / Fuente: LAS CIEN MEJORES POESÍAS EN GUARANÍ

POESÍAS de
(Enlace a datos biográficos y obras)
**/**
CHE AKÃ KORAPY POTY
** (Un granito de arena para el libro de oro ideado y preparado por los inspirados poetas y escritores "Tatajyva" y Pedro Encina Ramos).
** En "Che akã korapy poty"; el autor luce un estilo florido. De su pluma ágil y vivaz fluyen versos que bailan a ritmo de polka chispeante. Su métrica, exacta. Su rima perfecta. Sus metáforas, coloridas. T.
-
Hoky pyahuete mandu'a rakã che akã korapýpe
ha ijaty hese guyra'i rari reko jeroky
oguapy che ãnga omaña ñemí tape rembe’ýpe
ha ohechapaite che reko yma rekove rory.

. Ajepovyvy pukavy reka tesarái ruguápe
. che pyrữ hague tapere potĩ ajohéi pyahu
. ha ajuhu hendy mbyja guasuete pe tape ku'ape
. che rape sakã ñangarekoha che sy kunu’ữ.

Arapy ryjúi morotĩ sakã cherupí kyhápe
che reroguata torore potĩre ha cheropevy
che py'a kyrỹi, che pepo roky, ajupí yvápe
ha morotĩmbáva che akã renimbo hữvera jey.

. Che reko ypykue ro'y porãita hovyữ kyrỹiva
. hetaiteva'ekue chereñói porãme amombo reí
. ko'áğa ahekárõ mombyry ijapýri ogueroñaníva
. tapemi havẽre ãho pepo ári chehegui oñemi.
Clementino Ocampos
**/**
YVOTY ÁRA GUAHẼ
** ¡Qué fiesta de colores, música, danza, aromas, vida y amor despierta la batuta maravillosa, la pluma de Clementino!
** Forma: trabajada con esmero y con éxito. T.
-
Oguahẽvo yvoty ára
opukavývaicha arapy
mainumby ojeroky
yvotýpe ombojere
ijeírama oipyte
ku he’ẽ asyetéva
ñaimo’ãvaicha he'íva:
ipyahu che rekove.

. Oguahẽvo yvoty ára
. opaitéichagua guyra
. mamóguiopa osẽmba
. ko’ã Tupã rymbami
. ku guyra porã pytã’i
. iñakãme ijyvotýva
. opurahéi he’ẽ jukýva
. oñe'évaicha guarani.

Oguahẽvo yvoty ára
jahecha panambikuéra
che ha’éva hesekuéra
yvoty kypy'yha
oiporu yvytu kyha
ku ojupi ha oguejývo
che ãngapy japyhývo
che árivaicha ho'a.

. Oguahẽvo yvoty ára
. yvytu hyakuã yvotýva
. che ñe'ã ojavykýva
. ombopyahu mandu'a
. yma guare oguerupa
. ombyaty che renondépe
. ha amo che ãnga kuaitépe
. nde réra ipoty jera.

Oguahẽvo yvoty ára
porãme oñombojovái
ka'aguy ha javorái
kuarahy ndive ojuapi
ha umi mbyja morotĩ
pyhare omyesakãva
che rembiayhúpe ojoguáva
chemoãho vevuimi.

. Oguahẽvo yvoty ára
. che apytu’ữ henyhẽ chovi
. ñe’ẽ yvoty guaraní
. mbaraka sãre ipojái
. mborayhu porã resãi
. añandu che rekovépe
. ha yvytu irundyvépe
. ambo "viva Paraguay".
Clementino Ocampos
**/**
(Fuente: LAS CIEN MEJORES POESÍAS EN GUARANÍ. Con nuevas incorporaciones y grafía actualizada. Por PEDRO ENCINA RAMOS TATAJYVA – RUBÉN D. CÉSPEDES (PORTALGUARANI.COM) Asunción-Paraguay 1997 – 425 páginas)

No hay comentarios:

Publicar un comentario