ZENÓN BOGADO ROLÓN - MASKÓI / Fuente: POESÍAS DEL PARAGUAY – ANTOLOGÍA DESDE SUS ORÍGENES. ARAMÍ GRUPO EMPRESARIAL

Autor: ZENÓN
BOGADO ROLÓN
(Enlace a datos biográficos y obras
En la GALERÍA DE LETRAS del
www.portalguarani.com )

MASKÓI

Peẽ, ha'e
Che ru
Che sy
Che ryke'y
Che ryvy,
Che reindy
Ha che retãygua
Añetete.
Mba'ejára tee
Ára yma guive,
¡Naimo'ãi
Peikoha
Yvy'ỹre.

Peẽ!
Yma,
Ymaite,
Ymaiteve,
Yvy ndetuicháva,
Yvy neporáva,
Yvy neresãiva
Omokyrỹi,
Ohavi'u
Ñembokipami,
Temitỹ
Penemba'e.

Tajy reko yma
Piro'y raity tee
Pejapo
Jeguákami
Ha iguýpe
Peke,
Pepáy,
Pepu'ã,
Peguata
Peñani,
Pemba’apo,
Peñe'ẽ,
Pepurahéi,
Penderory,
Pevy'a,
Pepuka
Pende reko teetépe,
Ha peñembo'e
Pende jerovia
Jaraitépe.

Yvy guasu,
Temitỹndy,
Tesãi ko'ẽ,
Ñembo'e añete
Ha vy'a
Hekovia
Hekovia
Hekovia
Tekoasy
Hetaitépe...
Yvy guasu
Hekovia
Kokuerépe;
Tapỹi
Jeguapa,
Piro'y,
Hekovia
Yvyra guýre;
Jekaru
Hekovia
Py'a nandíre;
Tesãi
Hekovia
Mba'asy po'i
Ha ai pochýre;
Vy'a hekovia
Ñembyasýre
Ha ñembo'e
Purahéi,
Purahéi jeroky,
Jeroky Tupã andu,
Hekovia,
Omyengovia
Jahe'o!

Pytagua marã'ỹva
Rembijokuáigui,
Mombyry
Teko marangatu.
Ojapete
Pende rete
Rekovére
Jeporiahuvereko'ỹ,
Jejahéi,
Ñemboyke,
Ñemosẽ.
Sagua'árõ
Pende apo;
Ka'aguýre peho,
Pejeko,
Pemano...
.
Oñapytĩ
Pene kũ
Pende po
Pende py.
¡Ñe'ẽngu
Ojapyhy
Pende yvy!
¡Jepoyhu
Omokañy
Pene ã
Ha ombogue Ruvusu
Jerovia!

¡Ñe'ẽpoty
Rekove apohára,
Mamópa peine,
Mamo pekañy,
Peipyhy kyhyje
Ha ikangy
Mbarete,
Ajevérõ nosẽi
Purahéi
Ipochýva
Apysa
Jokaha,
Tymasã
Kytĩha!
¡Ha tapicha
Ñembo'ereípe ohasáva
Ko'ẽ,
Ka'aru,
Pyhare;
Po ñemoĩme,
Jovayvareípe,
Tĩndyhápe,
Kirirĩhápe,
Ñesũháme,
Hekove ombotujúva!

Ha nde, Ore jára,
Nandeapysáipa,
Nderesaráipa,
Naneñe'ãipa
Ajevérõ
Nderehechái,
Nerehendúi,
Nerehendúi,
Umi che retãygua
Jehasa asy,
Rekove tuju!

MASKÓI. Son Uds. mi padre, mi madre, mi hermano, mi hermana. Y verdaderos patriotas hermanos míos. Dueños auténticos desde la noche de cuanto existe. Resulta difícil creer cómo pueden vivir sin tierra. (La poesía va describiendo la condición infrahumana a la que fue condenada la etnia Maskói en nuestros días).
.
Lectura recomendada: POESÍA PARAGUAYA EN GUARANÍ por RUDI TORGA
Fuente: POESÍAS DEL PARAGUAY – ANTOLOGÍA DESDE SUS ORÍGENES. Realización y producción gráfica: ARAMÍ GRUPO EMPRESARIAL, Dirección de la obra: OSCAR DEL CARMEN QUEVEDO. Recopiladores y autores: RAÚL AMARAL, MARÍA BARRETO DE RAMÍREZ, AÍDA ORTÍZ DE CORONEL, ELA RAMONA SALAZAR S., RUDI TORGA / Tel. (595-21) 373.594 / arami@rieder.net.py – Asunción / Paraguay. 2005. 781 pp.).